Arestado ang apat na suspek sa isang insidente ng robbery hold-up sa Sitio Pulong Ligaya, Brgy. Bagumbong Jala-Jala, Rizal, Miyerkules ng hapon.

Kinilala ang mga suspek na sina alyas ‘Jom’, 24; alyas ‘Anold’, alyas ‘Popoy’ at alyas ‘Jom’, kapwa mga residente ng nabanggit na lugar.

Sa report ng Jala Jala police, lulan ng tricycle ni alyas Jom ang biktima na si John isang kolektor ng isang lending company sa lugar nang biglang parahin ng tatlong kasabwat

Agad na nagdeklara ng hold-up ang isa sa mga suspek sabay tutok ng patalim sa biktima at sapilitang tinangay ang bag na may lamang pera na nagkakahalaga ng higit P30,000 mula sa mga nasingil nito.

Makaraang dumulog sa tanggapan ng pulisya ang biktima, agad na nagkasa ng follow-up at hot pursuit operation ang mga kapulisan.

Sa tulong ng isang witness mabilis na natunton ang bahay ng tricycle driver at agad ito naaresto sabay itinuro ang iba pang mga kasama nito.

Sa tulong ng asawa ni alyas Jom itinuro nito kung saan itinago ang bag na may lamang pera.

Narekober ang P30,000 at ang bag ng kolektor.

Paliwanag ng dalawang suspek, prank lang umano ang nangyari subalit di nila malaman kung bakit nauwi sa totohanang pangho-hold-up.

Sa ngayon nasa Jala Jala Municipal Police Station ang apat at nahaharap sa kasong robbery.