Inihayag ng Land Transportation Office (LTO) na isa pang empleyado nito ang kasalukuyang hinahanting na itinuturong mastermind sa pagnanakaw ng plaka sa planta ng ahensya.

Sa press briefing Biyernes ng umaga, iniharap sa midya nina LTO Chief Assistant Secretary Vigor Mendoza II at Department of the Interior and Local Government (DILG) Secretary Benjamin Abalos Jr., ang tatlong empleyado na naaresto noong Huwebes habang nasa aktong nagpupuslit ng limang plaka sa LTO Central.

Kinilala ang mga kawani na sina Jenard Arida at Arjay Anasco, embossers, at Valeriano Labayno, warehouse staff, sa Plate Making Plant sa LTO Central Office.

Ayon kay Mendoza, may isa pang hindi naaresto sa operasyon na lumalabas na mastermind ng sindikato at ito ay tinutunton na ngayon.

Paliwanag ni Mendoza, isang taon ng minamanmanan ng Intelligence and Investigation Division (IID) ang kaduda-dudang aktibidad ng grupo sa loob ng planta ng ahensya.

Matapos ang inisyal na imbestigasyon, noong Lunes ay sumulat ang LTO sa Special Project Group ng DILG para arestuhin ang mga suspek.

Sa ginawang operasyon, kapwa mga empleyado sa planta ang mga nahuli na ang modus, hindi lang basta pagnanakaw ng plaka, kundi sila mismo ang nagmamanufacture nito o “made to order” at ibinebenta sa halagang P5,000 hanggang P10,000 kada piraso.

May hawak na g CCTV footages ang LTO kung saan nakunan na isinisingit ng mga suspek ang pag-imprenta ng plaka at saka patago na ipupuslit palabas ng planta.

Isasailalim na sa inquest proceedings ngayong umaga ang mga naarestong suspek at kabilang sa kasong isinampa sa mga suspek ay qualified theft.

Tiniyak ng LTO na patuloy ang malawakang imbestigasyon sa pangyayari upang matukoy kung may iba pang kasabwat ang mga inarestong kawani sa loob ng ahensya at nagsasagawa rin ng audit mula 2018 para malaman kung gaano karaming plaka na ang na-duplicate at naipuslit ng sindikato.

Binalaan din ni Mendoza ang mga bumili ng mga plaka ng sasakyan mula sa grupong ito na may kinakaharap na kaso dahil sa pagbili ng nakaw na plaka.

Nanawagan naman si Abalos sa car owners na ipasuri ang naisyu sa kanilang plaka ng sasakyan upang matiyak na ito ay genuine.